29 de setembro e 3 de outubro de 2009

Balea Dous, segundo da clase detrás do Arroutado II.

Celebrouse esta clásica da Ría de Vigo fóra das datas habituais de comezos do verán en que se viña facendo habitualmente, e notouse. De ser frecuente realizarse con nortes frescos pasamos ventos frouxos e variables, ou sexa: “¡imos ver se acabamos!”.

A primeira proba, unha costeira, con saída fronte ao porto de Bouzas e pasos por Subrido e Bondaña, con volta a Bouzas.

Saída con brisa frouxa de Oeste que a pouco de pasar a Borneira empeza a escasear. Arroutado tírase a Liméns, posiblemente agardando que saltara o NO, e falla na táctica pois queda aboiado por esa zona e superado polos que fan o bordo polo medio da ría, Baltea e Reira, que se colocan á cabeza da flota nun excelente bordo. No Balea, máis pola ría que por terra, non quedamos descolgados dos 35s5 de Bouzas e viramos Subrido por detrás deles e con bastante vantaxe sobre o Arroutado.

Empopada cara Bondaña polo bordo exterior que nos leva ao grupo de cabeza a caer nun pozo que evitan os que veñen atrás facendo o bordo interior, e resultando un cambio total nas posicións. No paso de Bondaña, Arroutado e os que se colaron polo interior, Druida e Iumar, xa se colocan á cabeza da regata.

O vento rola e ponse de terra, un ESE moi frouxo que fai que uns busquen camiño por Samil e outros pola ría, con diferentes resultados. Nun momentos ían ben os da ría e noutros os de terra.

Acabamos entrando por detrás de Baltea e Reira, e sen saber se os tempos compensados nos darían para estar diante deles na clasificación da etapa.

A segunda proba é un barlovento-sotavento, con pouco vento de OSO, e con pouca historia.

O Arroutado II colle a cabeza de saída e o Balea disputa a regata co Reira, sen conseguir achegarse o suficiente para facer valer o rating. Facemos un terceiro posto.

Na clasificación global das dúas etapas quedamos en segundo lugar, detrás do Arroutado de Rodolfo R., un posto co que non contabamos despois da mala posición acadada na primeira proba, pero que foi posible polos desiguais puntos obtidos polos outros barcos da clase nas dúas probas.

 

O BALEA DOUS remata a tempada subindo novamente ao podio.

Ás 16 h. dase a saída fronte ao peirao de Bouzas para dirixirse a Bondaña e volta, con pasos por Rodeira (Er) e Tofiño (Br). Vento frouxo de SW.

Saída algo retrasada do Balea Dous que neste primeiro tramo ata Bondaña non atopa o se punto optimo de velocidade. O vento está moi raro habendo pozos onde quedabas clavado, ao lado de corredores por onde te podías escapar dos barcos próximos. Parte da frota fai o bordo de Samil mentras o Balea segue rumbo W polo medio da ría ata entrar nun vento fresco que rola á dereita. Ao virar o Balea ten na proa a baliza de Bondaña e deslízase rapidamente cara ela. Neste bordo xa pasa pola proa aos barcos do bordo de Samil. Virada en Bondaña e empopada con rumbo a Liméns levando só catro barcos pola proa. Non está clara a opción do norte polo que faise trasluchada no medio da ría para poñer rumbo a Bouzas, seguindo ao Menudeta que acababa de escoller esta opción e na que se ve que porta mellor o spí que aos do norte. Neste rumbo foise agrandando a distancia coa frota que precedía, mentras todos insistían na opción norte. A vantaxe collida xa foi insalvable, facendo un primeiro posto folgado.

Regata con vento fresco que favoreceu aos barcos grandes e non deu opción ao Balea para defender o primeiro posto da primeira regata.

Sin máis historia acabou o Trofeo Vila de Bouzas con outro segundo posto para o Balea Dous.

A destacar o bo ambiente que se vive nesta regata da vila mariñeira de Bouzas, e a boa organización do Liceo Marítimo. A sardiñada á veira do mar, acompañada de boa empanada, e todo regado con viño e cervexa a discreción, deixou moi bo sabor de boca.