«Balea Dous» gaña a Interclubs da Ría de Vigo por terceiro ano consecutivo

Vigo, 23 de xuño de 2019.- Os líderes provisionais da III Regata Interclubs Ría de Vigo certificaron na terceira e última proba este sábado o seu triunfo final. O evento, que organizaron conxuntamente Real Club Náutico de Vigo, Monte Real Club de Iates de Baiona e Real Club Náutico Rodeira co patrocinio de Mitsubishi Motors e Conservas Orbe, pechouse con vitoria parcial de “Starfighter” (Xulio Rodríguez, RCN Vigo) no grupo 1, “Fend-la-Bise” (Jean Claude Sarrade, MRCY Baiona) no 2, e o “Balea Dous” (Luís María Pérez, RCN Rodeira) no grupo 3, que os consolidou tamén como gañadores da xeral.

Un percorrido costeiro de 8,5 millas, desde o Peirao de Transatlánticos até a baliza de Bondaña, en Toralla, gozou de bos ventos do suroeste, con 12 nós, e só unha encalmada á altura de Cangas para o “Starfighter” provocou que a súa vitoria en tempo real (1h.28.32) fose apretada ante o “Fend-la-Bise” (1h.31.30) e o “Deep Blue 2.0” de Vicente Cid e grímpola do náutico vigués (1h.33.24).

Despois de tres xornadas disputadas por unha frota de 18 unidades, o, “Starfighter” releva ao “Aceites Abril” como campión do grupo 1 e o “Balea Dous” reedita título de anteriores edicións con pleno (1-1-1). No grupo 2, Sarrade (1-3-1) levou o triunfo co seu ILC 30, mentres que “A Burla Negra” (Juan J. Martínez, CN Castrelo de Miño), que ía líder, non disputou esta proba, perdendo toda opción.

A entrega de premios, no Náutico, pechou a competición.

Primeiras regatas en cruceiro

Rosina, o barco de Julián Zarauza foi o primeiro cruceiro en que practicamos a vela pesada. Foi o gañador da primeira edición da Regata Rías Baixas, no ano 1964,  patroneado polo «master» Benigno Cuevas (o vello).

(1970) Norte X, cruceiro botado no ano 1970 e construído integramente na carpintería e talleres de Massó. Por varios anos foi gañador das Rías Baixas.

(1971) Proa a Salgueirón no Norte X.

(1971) Norte X e Rosina, os dous barcos de Salgueirón, no porto de Vilagarcía rematada unha etapa da Regata Rías Baixas. Pola dereita está o Iris III de Laureano Solla. As tripulacións comentan a regata á chegada a porto. Entre outros: Tomás Massó, Benigno Cuevas (o vello), Jaime Massó, Tomás Bolivar, Julián Zarauza, Benigno Cuevas (o xoven), Tomás Pérez,…

(1971) No Norte X, entrando na Costa da Vela, levado sempre pola fina man de Benigno Cuevas (o vello), o máis temido e respectado patrón de todas as rías.

(1971) Norte X regresando a Salgueirón depois de gañar a regata máis importante do momento, a Rías Baixas.

(1971) Norte X, voando cara á vitoria da etapa das Rías Baixas en Vilagarcía. Tripulación de popa a proa: Benigno Cuevas (o xoven), Luis Pérez, Santiago Bolíbar, Benigno Cuevas (o vello) e Tomás Massó.

(1974) Este ano facemos as Rías no Carina, barco de José Manuel Piñeiro e xemelgo do Rosina. Entre os tripulantes, Luis Pérez, Manuel Rodríguez (Litos), Tomás Arís,…

(1974) No Carina con Manuel Rodríguez (Litos) e Julián Zarauza.

(1974) No Carina, de empopada rumbo a Baiona. Na foto: Luis Pérez, José M. Piñeiro, Julián Zarauza, …

Entre 1980 e 1985, navegamos no Puma 34, «Undine», de Willem Keiholz, con tripulantes como Javier Amaro e Gustavo Guntín. Acadamos meritorias victorias nestes anos. Campión da clase IV nas Rías, entre outras.

(1982) W. Keiholz e Luis Pérez son vencedores da I Copa Presidente do Monte Real Club de Baiona, en categoría «a dous».

 

(1983) Luis Pérez, Javier Amaro e Gustavo Guntín regresando ao Undine despóis da noite de «regata» en terra.

 

Pisco: o bote.

Bote tradicional saído das carpinterías de ribeira de Domaio e aparellado con Marconi.

Nos anos 60 era propiedade do Dr. Gerardo Corbal, quen disfrutaba cedendo o barco para que navegara todos os días aínda que el non puidera saír.

O bote estaba ao cargo de Benigno Cuevas (o xoven). No inverno gardábase en Massó, e chegado o verán, cada ano lixabamos e pintabamos para botalo ao mar e que lucira impecable. Quedaba fondeado en Salgueirón.

(1971) Moitas horas de navegación nas que aprendemos e disfrutamos da vela toda unha xeneración de navegantes de Cangas.

(1970) Un día calquera: Paco Cuevas á caña e Tomás Pérez.

(1970) Facendo banda.

(1971) O bote nos permitía seguir as regatas da importante flota de snipes que había na ría de Vigo a finais da década dos 60.

(1971) O snipe «Chuvias» do mítico Cholo Armada, campeón de España en tres ocasións.
(1971) O snipe «Sur» de Jaime Massó, con Benigno Cuevas á caña, nesta regata. O «Sur», con Jaime e Fernando Massó foi campión de España no ano 1952.

 

“BALEA DOUS” REMATA A TEMPADA DE REGATAS AO MÁIS ALTO NIVEL

Coa entrega de premios celebrada o pasado sábado no RCN de Vigo deuse fin á tempada de regatas de Cruceiros das nosas rías, e neste acto, o “Balea  Dous”, barco que navega baixo a  grímpola do RCN  Rodeira de Cangas, recibiu o premio de vencedor da clase Cruceiro na Regata  Open de Inverno-Trofeo Repsol.

Con este premio a tripulación canguesa completa unha tempada dificilmente  superable, despois de disputar as regatas máis importantes das Rías Baixas e subir ao máis alto do podio noutros seis trofeos, ademais do último recibido.

Así pois, o “Balea  Dous” resultou vencedor no Trofeo Comunica, Trofeo Repsol-Regata Primavera e 33º Trofeo Príncipe de Asturias, organizados polo  MRCI de Baiona; Trofeo Repsol- Open de Inverno e 55ª Regata Rías Baixas, organizadas polo RCN de Vigo; Copa de España de Cruceiros do  RCM de  Aguete; 2ª Regata  Interclubes Ría de Vigo organizada por RCN de Vigo,  MRCI de Baiona e RCN  Rodeira, conxuntamente. Outros resultados meritorios foron un segundo posto no 43º Trofeo Conde de Gondomar do  MRCI de Baiona e un terceiro na 14ª Volta  ás  Illas do RCN  Rodeira.

Unha gran tempada que confirma ao barco de Cangas tras a súa traxectoria dos últimos anos, como o rival a bater na súa categoría, o que tamén supón para a súa tripulación un importante reto para as próximas regatas que empezarán a partir de mediados de Xaneiro.

Ao longo deste ano nas distintas regatas alternaron a tripulación do Balea Dous, ao mando de Luis Pérez: Suso Martínez, Julián Pereiro, Humberto Ferral, Manuel Cordeiro, Mauro Nogueira, David Rodríguez, Edu Maldonado e Mario Molina. Gran equipo e principais artífices dos logros conseguidos.

Balea Dous gaña a 21ª Regata de Cruceiros de Aguete-Copa de España

Este ano si puidemos desprazarnos á ría de Pontevedra para participar na «Regata de Aguete» pois era asignatura pendente de uns anos atrás. A regata ía esixirnos unha navegación se erros pois os rivais serían o mellor da categoría ORC-4. Entre os máis complicados estaban Arroás, Chispa Nejra, Deep Blue, Travesío, Grifo,…

A regata costeira saíu ben. O barco máis rápido que nós era o Arroas, polo que non deixamos que se fora lonxe. Na empopada de subida hacia Aguete fomos botándonos enriba del e conseguimos entrar diante en real e compensado. Un primeiro posto que habería que defender nos barlo-sota do día seguinte.

Segunda xornada con dous barlo-sota programados e con vento por riba dos 12 nós. Habería que fiar moi fino con toda a flota facendo bordos en tramos de milla e media. A primeira proba, sen erros, marcando o camiño aos da clase e o Balea disfrutando das ideais condicións. Primeiro en real e compensado e terceiro absoluto. Fantástico!

A segunda proba comeza con problemas. O barco se amosa pesado e se arrastra con dificultade. A causa, un molote de algas xaponesas que enganchamos no timón e arrastramos por bastante tempo e sen poder despegarnos dos rivais máis pequenos. Liberamos no penúltimo tramo e aínda entramos primeros en real e segundos a 7 segundo do Chispa. O trofeo estaba gañado.

Balea Dous de novo no podio da Conde de Gondomar

MRCY Baiona. 21/07/18.- Na clase Coca Cola ORC 4, o vencedor da xornada foi o Fend la Bise de Jean Claude Sarrade, do Monte Real Club de Iates. Empregou pouco máis de 5 horas en finalizar o percorrido e colocouse en primeira posición da clasificación provisional. Séguenlle, en segundo e terceiro posto, A Burla Negra do Club Náutico de Castrelo do Miño, capitaneada por Juan José Martínez; e os cangueses do Balea Dous, con Luís Pérez á cabeza.

MRCY Baiona. 22/07/18.- Un dos barcos que máis sufriu os caprichos do vento foi o Unus de Luís García Trigo, que tras asinar unha espectacular regata levando a toda a frota á súa popa, viuse relegado á última posición da táboa da clase Coca Cola ORC 4. Nesta mesma categoría, o Balea Dous de Rodeira, con Luís Pérez á fronte, logrou subir da terceira á primeira posición, facendo caer ao Fend la Bise de Jean Claude Sarrade (Monte Real Club de Iates) e A Burla Negra de Juan José Martínez (Club Náutico Castrelo de Miño) ao segundo e terceiro posto respectivamente.

MRCY Baiona. 25/07/18.- A clase Coca Cola ORC 4 foi a que máis variacións sufriu ao longo do campionato, pero houbo 3 barcos que destacaron por encima do resto e que finalmente coparon o podio de gañadores. Foron o Balea Dous de Rodeira, o Fend la Bise do Monte Real e A Burla Negra de Castrelo de Miño. Chegaron á final empatados a puntos, e a súa disputa no último bastón foi determinante para Jean Claude Sarrade, que liderou ao Fend la Bise do Monte Real  ao máis alto do podio. O Balea Dous de Luís Pérez e A Burla Negra de Juan José Martínez levaron o segundo e terceiro premio respectivamente.

 

Balea Dous campión da Interclubes da Ría de Vigo por segundo ano consecutivo.

Náutico Rodeira, 25/06/2018.- Esta fin de semana ponse en xogo o cetro da Ría de Vigo. O sábado dispútase a primeira proba da II Regata Interclubes que organizamos co Monte Real Club de Yates de Baiona e Real Club Náutico De Vigo, coa colaboración técnica de desmarque s.l..

01/07/2018.- Resumo da 1ª Regata do Trofeo Interclubes Ría de Vigo 2018.
Primeiros de clase e terceiros absolutos.

08/07/2018.- Este sábado disputamos a segunda regata do Trofeo Interclubes da Ría de Vigo, nesta ocasión organizada polo noso club, o RCN Rodeira. Deuse a saída ás tres da tarde cun ventiño de WSW que nos primeiros compases da regata sobrepasaba os 12 nós pero que logo foi a menos e coas típicas roladas á dereita no tramo Borneira-Subrido, levounos a facer un slalom entre as bateas de Liméns e con repetidos cruces cos barcos de clase 3, Unus e La Burla Negra. Viramos Subrido cuartos en tempo real detrás de Abril (First 44.7), Starfighter (First 40.7) e Unus (X332), mesma orde de entrada en meta tras 7 millas en rumbos de popa e través, en rápida navegación con puntas de 7-8 nós.
Tras a compensación de tempos, o resultado foi 1º de clase e 1º da xeral absoluta. A falta de unha regata para a conclusión do Trofeo Interclubes, somos primeiro de clase con dous puntos sobre o Deep Blue e segundo absoluto a un punto do Abril. Nada garantizado, todo por decidir. O próximo sábado a solución. #BaleaPower

16/07/2018.- Rematamos este sábado a Regata Interclubes Ría de Vigo, co resultado final de primeiro da clase ORC4 e segundo absoluto. A última regata desta serie desenvolveuse dun xeito similar ás dúas anteriores, con vento un pouco máis de SW e algo máis de forza no inicio, pero logo baixou por debaixo dos 12 nós. O segundo da clase ORC4 foi o DeepBlue e o vencedor absoluto, o Abril, tamén gañador de ORC1. En ORC3 gañou Unus.

Balea Dous alzouse co triunfo no Trofeo Repsol de Baiona

Na Clase Cruceiro invertíronse os papeis con respecto á edición de 2017. O Balea Dous de Rodeira, que quedara entón segundo, fíxose este ano coa vitoria; e o vencedor da anterior edición, o Fend la Bise de Jean Claude Sarrade, do Monte Real Club de Iates, fíxose coa prata. Ambos recibiron o seu premio de mans do alcalde de Baiona, Anxo Rodal, que entregou ademais o bronce ao Albarellos de Fernando Rei, do Club Náutico de Portonovo.

Vitoria do Balea Dous no II Trofeo Comunica

O MBA venceu no percorrido Vigo-Baiona xunto co Balea Dous de Luís Pérez, que levou a Rodeira por segundo ano consecutivo un dos ouros da competición.

No trofeo, que este ano cambiou de deseño e celebrouse cun formato de dobre saída desde Sanxenxo e Vigo, participaron máis de 200 regatistas a bordo dos 34 barcos inscritos. Unha frota que tivo que facer fronte a unhas condicións complicadas polo vento, que desapareceu por momentos e deixounos flotando en encalmadas que chegaron a durar ata hora e media.
Máis curto foi o trazado para os veleiros que tomaron a saída en Vigo ás dúas da tarde, unha hora despois que os de Sanxenxo. Navegaron algo máis de 9 millas e media ata Carallones, onde o comité de regata decidiu acurtar percorrido tras sufrir unha gran encalmada en Toralla.
Divididos en dúas clases segundo a súa capacidade competitiva, os que finalmente levaron a vitoria foron o MBA Atlántico de Rui Ramada do Monte Real; e o Balea Dous de Luís Pérez, que veu disposto a repetir triunfo, e levou de novo a Rodeira o ouro que xa conseguira en 2017.