XVIII REGATA VOLTA ÁS ILLAS CÍES

BALEA DOUS gaña a XVIII Volta ás Illas Cíes na clase ORC

18/05/2024.-  Disputouse este sábado a XVIII edición da Regata Volta ás Illas Cíes que organiza o Liceo Marítimo de Bouzas, con boas condicións de vento só alteradas polo paso dun chuvasco que complicou a navegación nalgún momento. Tras o chuvasco abríronse claros, pero caeu o vento, o que sumado ao forte mar de fondo que había na boca norte da ría, dificultou o paso da Punta Cabalo, ao norte das Cíes, á que hai que dar respectable resgardo polos baixos e rompientes da zona. O percorrido, de 24,5 millas, completouno o Bon III, de Víctor Carrión que competía na clase A 2 tripulantes, en 3 horas e 51 minutos, facendo unha media de 6,4 nós e levándose o triunfo en tempo real e compensado. A clase ORC, barcos con tripulación completa, gañouna o cangués Balea Dous, completando o percorrido en 4 horas 35 minutos, o que supón unha media de 5,4 nós. Na categoría de navegantes solitarios gañou o Ronáutica Mariñas de Joaquín Carneiro.

46ª REGATA DE PRIMAVERA

28-05-2024.- Este domingo finalizou en Baiona unha nova edición do Trofeo Repsol, a histórica Regata de Primavera do Monte Real Club de Iates, que neste 2024 cumpriu a súa 46ª edición con medio centenar de barcos regateando pola vitoria en tres xornadas de competición. Os cruceiros entraron en liza o sábado coa regata Baiona-Sanxenxo para rematar o domingo coa regata de volta, Sanxenxo-Baiona. En ambas as probas o vento tardou en entrar provocando adiamento na saída, pero púidose gozar dunha boa navegación, sobre todo o segundo día con ventos de NW de 14-15 nós de intensidade. En ORC-5, a vitoria levoulla o Balea Dous, do Club Náutico Rodeira, liderado por Luís Pérez. Tras vencer no Trofeo CdeC, a tripulación canguesa, cun primeiro e un segundo nas costeiras disputadas, meteuse unha nova vitoria no peto. Impúxose sobre o Nahela de Víctor Álvarez, do Club Deportivo Alagua, que quedou segundo, e o Travesío do Real Club Náutico de Sanxenxo, que quedou terceiro con César Martínez aos mandos.

 

 

TROFEO CdeC

20/04/2024.- A canguesa tripulación do Balea Dous leva o ouro en Baiona.

50 veleiros de España e Portugal disputáronse o pasado sábado nas Rías Baixas o Trofeo CdeC, a primeira do cinco regatas de vela pesada que o Monte Real Club de Iates ten programadas para este 2024. O MRCYB puxo en xogo a competición con dous percorridos diferentes, un máis longo entre Combarro e Baiona, e outro máis curto entre Vigo e Baiona. A regata correuse con vento moi frouxo o que dificultou a progresión da frota e fixo que o Comité de Regata decidise acurtar os percorridos, quedando o final da proba de Combarro á altura do illote Viños, fronte ás Cíes, onde conseguiuse chegar tras máis de cinco horas de complicada navegación. Nesta proba, a tripulación do Balea Dous, liderada por Luís Pérez, colocou a grímpola do Club Náutico Rodeira no máis alto do podio. A segunda posición foi para o Ronáutica Mariñas de Jorge Carneiro (CN San Telmo); e o Vagalume de Luís Vidal, que correu como independente, quedou terceiro. Na regata de Vigo a Baiona, os Aceites Abril dos irmáns Luís e Jorge Pérez Canle, que foi o máis rápido en completar o percorrido, logrou imporse tamén tras a compensación de tempos.

10ª INTERCLUBES DA RÍA DE PONTEVEDRA

A Regata Interclubes Ría de Pontevedra pechou a súa décima edición coa última etapa –que ía organizar a Comisión Naval de Regatas de Marín– suspendida debido ao forte vento, de máis de 30 nós de intensidade.

Así, as clasificacións non se moveron e o Orión de Javier Pérez (MRCYB) venceu en Clase 1; O Ronáutica Mariñas de Jorge Carneiro (Ro Yachts Club) fixo o propio en Clase 2, co Balea Dous de Luis Pérez (RCN Rodeira) terceiro; en Clase 3 venceu o Javitudo de Pedro Barbosa (Atlántico) co Espita de José Luis Lastra (Náutico Beluso) terceiro; En Clase 4 impúxose o Orlando de Gerardo Sánchez (Ro Yachts Club) co Cinco Illas Seida de Iñaki Carbajo e o Trotto de Ernesto Smyth (Beluso) segundo e terceiro. O Samoa venceu en Clase 5, e o Iasi e o Peregrina-Cobre San Rafael en Clásicos e Veteranos.

Trofeo Open de Outono 2023-RCN de Vigo

Participamos na última regata do ano, o Trofeo Open de Outono do RCN de Vigo, celebrada en catro sábados de novembro e decembro. (18 e 25/11, 2 e 9/12).
Boa participación, con 6 barcos en categoría A-2, 10 barcos a tripulación completa divididos en dúas clases: CRU-1 e CRU-2. Engadindo os 20 barcos inscritos en Concentración, categoría non competitiva, déuselle color e ambiente á ría nestes sábados outonais.

As tres primeiras regatas celebráronse con moi pouco vento, escaso e xusto para poder realizar un percorrido de 7 millas, que a maioría puideron rematar. A última proba foi a única que disputamos con bo vento, aínda que, fora pola ponte da Constitución ou polo invernal do día, a participación foi menor.

Aínda sendo diferentes as condicións nas catro probas, o curioso é que todas se fixeron co mesmo percorrido: Saída – Tofiño Bb – Guixar Bb – Chegada. Sinxelo pero eficaz, pois coas condicións tan escasas conseguimos rematar as catro.
A primeira proba veuse alterada pola entrada dun mercante que obrigou a despexar a zona sur da ría cando xa estabamos no tramo Tofiño-Guixar. Os que levabamos a empopada pola costa viguesa tivemos que cambiar a estratexia gañando a zona norte da ría.

Tras virar Guixar na popa do Esquío, quedaba un tramo de ceñida no que tratamos de adiantar ao rival con viradas e reviradas sempre ben contestadas o que non nos permitiu pasalos, pero tampouco perder a súa popa, o que foi suficiente para gañar en compensado.

Na terceira proba, no aprazamento de media hora e na zona próxima á saída, damos cun grupo de ramas de árbore, duns 4 ou 5 metros cada unha, que engarzadas, poderían supoñer un risco para algún barco. Damos aviso por radio ao comité informando das coordenadas para que os participantes o teñan en conta e avisen a seguridade marítima, se lles parece preciso. En cinco minutos chama Vigo Tráfico polo canal da regata, piden cambiar ao canal 10. Falamos, repito o que informei anteriormente. Me pide un teléfono para deixar libre o canal. Non entendo por que é preciso pero llo dou. Chama por teléfono e o amable funcionario di: “Por que no recogió usted las ramas? ….. ….. ….. …..

 Saída da terceira proba.

 A cuarta proba estivo ben servida de vento e choiva. Vemos na gráfica a situación entre as 3 e as 5 da tarde, tempo en que se navegou a regata. Comezamos con vento de 20 nós que foi progresivamente baixando ata os 13 nós. Xusto nesas dúas horas, o vento rolou de SW a W. A liña azul indica a choiva que foi persistente ata as 5 e media da tarde.

Video da empopada entre Tofiño e Guixar na que acadamos no Balea Dous os 9,5 nós de corredeira.

 Balea Dous, o Sun Fast 32i gañador da clase CRU-2, que, baixo a grímpola do CN Rodeira de Cangas, tripulan David Rodríguez, Mauro Nogueira, Manuel Cordeiro, Julián Pereiro e Luis Pérez.

 Esquío, o Ro 330 dos irmáns Castro, segundo clasificado na categoría CRU 2, e apretando cada vez un pouco máis.

 Salao, o Yatlant 24 de Juan Carlos Sicre, do LM de Bouzas.

 Salaño, un Sun Fast 36 con Jacobo Vecino e Brenda Maure, campións da categoría A-2, coma sempre, raiando na perfección.

 Vértigo Sailing, Sun Fast 36,  con Alfonso Crespo e Alejandro Busto, segundo clasificado na categoría A-2, e acechando de cerca ao experimentado Jacobo Vecino.

 Bonaventure, terceiro clasificado na categoría A-2, con José L. Ríos e Mª Jesús Montes, que están levando este Dufour 360 a postos destacados.

 Alalunga, First 32s5, e Aquilón, Fortuna 9, en segundo término.

 Virando Tofiño con pouco vento.