REAL CLUB NAUTICO DE VIGO
CRUCEIROS ORC
REGATA ENTRENO
PRE-INTERCLUBS PORTO DE VIGO
Sábado 8 de Novembro de 2008 – Percorrido costeiro
DIVISIÓNS PARTICIPANTES: Serán a base para o Trofeo Porto de Vigo
División ORC REGATA
Barcos cuxo GPH está entre 490 y <618 sg/milla
División 0RC REGATA / CRUCEIRO
Barcos cuxo GPH está entre 618 y <662.5 sg/milla
División ORC CRUCEIRO / REGATA
Barcos cuxo GPH está entre 662.5 y <720 sg/milla
División ORC CRUCEIRO E EXTRA
Barcos cuxo GPH está entre 720 y <790 sg/milla
————————————–
CRÓNICA DO DÍA
Previa, 08/11/08
Levabamos xa moito tempo sen competir e a tripulación xa tiña mono de regata, así que non perdemos a oportunidade. O Náutico de Vigo convocou unha regata de adestramento, previa á serie do Porto de Vigo, e alá fomos sen máis interese que navegar de novo en equipo e facelo en compañía doutros barcos, pois o Balea aínda non estaba en condicións óptimas para a regata. Aínda con parte do equipamento de verán e coa obra viva en moi mal estado, tan malo que ata a motor custáballe moverse. Era o de menos. Agradecemos a convocatoria e quedamos para facer a primeira saída da tempada.
De seguido comprobamos o pouco que andabamos. Na saída o Menudeta pásanos por sotavento coma se foramos un zapato aboiado e sen deixarnos repoñer o Iumar por barlovento e tripulado en solitario por Rui Peixoto. Empezamos ben!
Así que os nosos esforzos foron todos a conseguir non selo faroliño do pelotón.
Non iamos mal, loitando co Furaventos e o Fecht, que por certo, saíra dez minutos tarde, cando por diante do Peirao de Trasatlánticos, xa chegamos ao colmo da lentitude. Cun aparente de 14 nós, o barco escorado e andando 2 nós. ¿Que pasou? ¿Escarallamos a corredeira? Pois non, o barco non anda e fai pola popa uns remuíños raros. Pasou por alí o monitor dos 420 na zodiac e lle pedimos que vira se levabamos algo no timón. Non, no timón non, pero mirando ben,…. puff, o que levades na orza! ¿Que é? ¡Unha rede ou algo así!
Pois nada, aproar, parar o barco a ver se baixa. Nin con esas. E o Independence of the Seas que quere saír pero o Balea está parado e facendo cousas raras ao seu costado. Hai que arrancar motor e dar marcha atrás, e ao pouco vemos un gran plástico azul que segue o seu camiño entre augas.
Impresentable o estado de limpeza desta ría. Moito gabarse de que recalan os maiores cruceiros do mundo e logo navegamos entre plásticos, caixas aboiadas ou troncos, ás veces nada desdeñables.
¡E que non se che ocorra protestar nin moito menos a insubmisión de deixar de pagar as “equiscincos” e demais taxas que pagamos supostamente polo uso dunhas augas limpas e seguras!
Aaaah! Tempos aqueles en que os piratas andaban polo mar e subían a bandeira negra cando te ían asaltar! Xa se perderon as maneiras!
De regreso a porto, entraba unha fronte que descargou abundante chuvia toda a noite.