BALEA DOUS, CAMPIÓN DA REGATA OPEN DE INVERNO DE CRUCEIROS.
Rematada a primeira regata do ano, o «Balea Dous» faise co Trofeo Repsol da clase Cruceiro, na Regata Open de Inverno organizada polo RCN de Vigo.

A regata estaba organizada para facer catro probas, entre o 20 de xaneiro e o 3 de marzo, das que só contabilizaron dúas por circunstancias meteorolóxicas propias do inverno. A primeira proba non a rematou ningún barco por falta de vento e a última tivo que ser suspendida por alerta laranxa decretada na zona costeira.

Os resultados das dúas probas finalizadas deron lugar a un axustado empate na primeira praza da clase Cruceiro, entre o «Deep Blue» e o «Balea Dous» decantando o triunfo a favor do último por ter mellor resultado na última proba. O terceiro posto foi para o «Atria».