Semana do Atlántico 2009. Regata A Dous.

Por fin decidímonos a participar nunha regata a dous, modalidade na que o Balea estaba por estrear, así que para a Semana do Atlántico a tripulación se reduciría ao patrón habitual, Luis Pérez xunto con Jesús Martínez (Suso).

O sábado 17 de outubro celébrase a primeira proba co seguinte percorrido: Saída, Lousal (Er), Salgueirón (Br), Lousal (Er) e chegada en Vigo. A distancia percorrida será dunhas 14 millas.

A saída dase ás 13 h., cun ventiño fresco de terra (ESE). Saímos amurados a estribor, ben colocados e con vento limpo. Imos andando ben e escollemos o bordo do norte da ría que resultaría ser o bordo malo, pois o grupo que fixo o bordo sur, pola zona da Lagoa, pasaría por diante sacando unha boa vantaxe.

Viramos Lousal e tomamos rumbo de popa con spí arriba. O vento vai baixando e desaparecendo case totalmente, tendo que buscar avanzar algo por medio das bateas de Moaña. Polo Con de Pego salta o novo vento, que nos leva de ceñida ata Salgueirón, na que viramos para volver a montar spí cara o Lousal. Queda unha longa popa cun 8 nós de vento que os que nos preceden plantean pola costa norte da ría. Non vemos mal a opción contraria, un bordo que nos leva a Guixar para logo subir a Lousal por A Lagoa, e no que só nos acompaña o Sailway 31.

 

Efectivamente, este bordo sae moi ben, colándonos por diante do Arroutado II en Lousal.

A pesar de problemas na izada de génova que nos fan perder algún minuto, conseguimos rematar unha boa ceñida en Vigo entrando por diante do Arroutado II.

 

A segunda proba, ao día seguinte, con saída ás 11 h., que nos leva a Subrido, Bondaña e regreso a Vigo, comeza con bo vento do fondo da ría pero con previsión de caida total a mediodía o que nos fai temer que a regata non se remate.



Rápido tramo de desmarque e empopada cara a Subrido facendo moi boa velocidade. Pasamos a Borneira, sen significativas diferenzas entre o grupo ata que, pasando Liméns o vento comeza a baixar un pouco. Chegamos a Subrido e cando estamos virando, todos bastante agrupados menos os tres de cabeza, Bosch, Terras e Cativos, que colleran certa vantaxe, cae de súpeto o vento quedando o resto da flota aboiados a velas vir, mentres curiosamente os tres de cabeza non perden o vento en ningún momento, vento fresco que os leva en rápida ceñida ata Bondaña e Vigo.

Pasa o tempo e non se albisca brisa que nos poida sacar de alí e comezan os abandonos. Con caalma, Palanquín, Arroutado II, Burlanegra,… e cando case imos seguir o mesmo camiño vemos que por detrás ven o Pitufo co spí inflado. Levántase unha lixeira brisa de NO que nos pon a traballar de novo, izar spí e tratar de chegar a meta antes do tempo límite.

Terminamos a proba no posto sexto o que nos leva a unha moi boa clasificación xeral das dúas probas: 6º na clasificación xeral “A dous” e 1º da clase Cruceiro-Regata.

Por suposto, dámonos por moi satisfeitos da nosa primeira participación en regatas de tripulación reducida.

Ata 21 clasificados.

 

Trofeo Vila de Bouzas

29 de setembro e 3 de outubro de 2009

Balea Dous, segundo da clase detrás do Arroutado II.

Celebrouse esta clásica da Ría de Vigo fóra das datas habituais de comezos do verán en que se viña facendo habitualmente, e notouse. De ser frecuente realizarse con nortes frescos pasamos ventos frouxos e variables, ou sexa: “¡imos ver se acabamos!”.

A primeira proba, unha costeira, con saída fronte ao porto de Bouzas e pasos por Subrido e Bondaña, con volta a Bouzas.

Saída con brisa frouxa de Oeste que a pouco de pasar a Borneira empeza a escasear. Arroutado tírase a Liméns, posiblemente agardando que saltara o NO, e falla na táctica pois queda aboiado por esa zona e superado polos que fan o bordo polo medio da ría, Baltea e Reira, que se colocan á cabeza da flota nun excelente bordo. No Balea, máis pola ría que por terra, non quedamos descolgados dos 35s5 de Bouzas e viramos Subrido por detrás deles e con bastante vantaxe sobre o Arroutado.

Empopada cara Bondaña polo bordo exterior que nos leva ao grupo de cabeza a caer nun pozo que evitan os que veñen atrás facendo o bordo interior, e resultando un cambio total nas posicións. No paso de Bondaña, Arroutado e os que se colaron polo interior, Druida e Iumar, xa se colocan á cabeza da regata.

O vento rola e ponse de terra, un ESE moi frouxo que fai que uns busquen camiño por Samil e outros pola ría, con diferentes resultados. Nun momentos ían ben os da ría e noutros os de terra.

Acabamos entrando por detrás de Baltea e Reira, e sen saber se os tempos compensados nos darían para estar diante deles na clasificación da etapa.

A segunda proba é un barlovento-sotavento, con pouco vento de OSO, e con pouca historia.

O Arroutado II colle a cabeza de saída e o Balea disputa a regata co Reira, sen conseguir achegarse o suficiente para facer valer o rating. Facemos un terceiro posto.

Na clasificación global das dúas etapas quedamos en segundo lugar, detrás do Arroutado de Rodolfo R., un posto co que non contabamos despois da mala posición acadada na primeira proba, pero que foi posible polos desiguais puntos obtidos polos outros barcos da clase nas dúas probas.

 

 

 

 

 

 

 

 

 

 

Balea vai,… Arroutado ven.

 

 

 

Virando Barlovento detrás do Reira.

 

XVII Regata Guardiamarina 2009

 

SEGUNDO CLASIFICADO DE CLASE E CUARTO GLOBAL

Os días 19 e 20 de setembro o Balea Dous participou na Guardiamarina comezando así a tempada de regatas 2009-2010.

Nesta ocasión a regata modificouse en relación ao que era habitual, facendo a primeira proba na Ría de Ponteverda co fin de facilitar a participación aos barcos que na semana anterior competiran no Desafío de Sanxenxo. Loxicamente este formato favoreceu aos barcos que estaban en Sanxenxo pero non aos que estaban na Ría de Vigo que tiveron que contar cun día máis para trasladar o barco a Marín.

Non parece que esta medida favorecera a participación pois este ano non pasaron de 25 os barcos, contra os case 40 que eran habituais. É posible que moitos barcos de Vigo desistiran de participar por falta de tempo para trasladarse a Marín e pola contra non se contou con participación da flota da Ría de Pontevedra, agás os da Escola Naval e algún de Aguete.

Primeira proba.-

Consiste nunha costeira con saída nas proximidades da Escola Naval, virada por babor en Mourisca e regreso a Marín, cun vento de SW frouxo pero bastante entablado na ría.

Non facemos unha boa saída e toca remontar. De seguido buscamos o norte da ría e nun par de bordos estamos por diante da nosa clase. O Zamora bastante descolgado e o Enxuto seguindo a nosa estela. A brisa é das que o Balea saca mellor rendimento en ceñida polo que mantemos aos seguidores controlados e mellorando a posición.

Pasando Morrazán hai que decidir se ir ao NO ou ao Sur. Non vemos clara a opción NO e decidimos xogala polo sur a pesar de que o Enxuto e o Iumar proban por aí e deciden non seguirnos. Pronto temos a sensación de que polo norte non andan tanto coma no sur e confírmase que foi a boa opción cando viramos Mourisca coa única ameaza por detrás do Zamora que tamén escollera opción sur.

Na popa mantemos en principio a vantaxe sobre o Zamora, ao que lle hai que dar tempo, pero un bordo de estribor que fixemos algo largo ata Mogor, fainos perder a vantaxe e só logramos entrar un minuto por diante do Zamora. Salvamos a regata que a punto estivemos de perder e facemos primeiros da clase.

Segunda proba.-

O domingo celébrase a clásica Marín-Vigo, e coma é habitual sen vento á hora da saída. Acaba entrando unha brisa de NO e dase a saída á altura do Morrazán. Mala saída de novo e volta a remontar dende atrás pero esta vez collendo todos vento largo será máis difícil gañar algún posto. Agasallos destes non se poden facer na nosa clase, onde o máis tonto fai reloxos. A nosa táctica redúcese a facer o percorrido por barlovento da flota buscando o NO máis fresco e afastándono o posible de Soavela, polas sorpresas que poida gardar. Andamos ben e xa fronte á Ría de Aldán izamos spí e navegamos nun través pechado. Os de máis adentro vanse quedando á altura do Facho, todos os demáis forzan o rumbo en dirección ao Norte de Cíes, e aínda así caen case todos nun pozo na boca norte da ría de Vigo. Por barlovento de toda a flota conseguimos pasar sen que se veña abaixo o spí e chegamos á altura do Zamora e deixando a moitos grandes a sotavento. Alongamos o bordo ata a Punta Muxieiro e trasluchamos poñendo rumbo a Vigo. Entrando na ría, o vento vai afrescando e lanzámonos nun través con spí no que mantemos uns 8 – 9 nós de velocidade, pero o Zamora tamén o fai ben e entra un minuto diante de nós.

Unha gran regata onde o Zamora fai primeiro absoluto e o Balea segundo, por diante de todos os grandes.

Na clasificación da clase, das dúas probas, quedamos empatados co Zamora. Os dous temos un 1º e un 2º, pero como desempata o posto da última proba, o Zamora gaña a clase e o Balea queda segundo.

Na xeral das dúas probas e de toda a flota, facemos un 4º posto.

 

Regata Open de Inverno 2009 – Última proba.

21 de marzo de 2009

REGATÓN DO BALEA DOUS QUE REMATA FACENDO UN PRIMEIRO

As previsións de vento para esta tarde eran bastante pesimistas. Non máis de 4 nós de NW rolando a NE. Fallaron outra vez. Tivemos un SW moi estable de 8 a 10 nós durante toda a regata.

O Comité de Regata repite percorrido por terceira vez consecutiva, montando unha Vigo-Tofiño-Vigo-Tofiño-Vigo, de unhas 10,5 Mn. O que sería aconsellable, é que este clásico percorrido, que con ventos de SW ben suple a un barlovento-sotavento, tivera a virada de Tofiño por babor para evitar os a veces complicados cruces nas proximidades da torre.

Moi boa saída do Balea Dous, con boa posición e velocidade, que dende os primeiros compases colócase na cabeza da súa clase e navegando á par de barcos de maior porte. Facemos un bordo longo pola zona de Rodeira que da moi bo resultado, virando en Tofiño á par do Reira e por diante do resto da clase.

A brisa fresquiña permite facer unha popa a case 150º con boa velocidade. Neste tramo, cara a metade, hai unha leve caída do vento. Alongamos o bordo a estribor, o que en principio nos vai ben, pero cara o final volve aumentar o vento aos que van máis ao norte, e perdemos algunha posición.

Segunda ceñida co mesmo vento que a primeira, facemos o mesmo bordo polo norte da ría e volve ser o bordo bo, pois viramos Tofiño por diante do Reira e co resto da clase bastante descolgada. Só faltaba facer unha boa popa, só preocupándose de sacar o máximo do barco e manter a posición. Coa baixada do vento, temos que navegar co aparente nos 120º, polo norte, conseguindo manter ao Reira, compañeiro inseparable nestas últimas regatas, na mesma posición, aínda que nos supera trala última trasluchada, para entrar en meta escasos segundos diante de nós.

O resultado da boa navegación realizada foi acadar o primeiro posto da clase e terceiro de toda a flota. Un premio que barco e tripulación merecíamos despois dunha segunda metade da serie, navegando a moi alto nivel.

CLASIFICACIÓNS:

Crónica de www.rcnauticovigo.com

Regata Open de Inverno 2009 – Sétima proba.

14 de marzo de 2009

Tocaba regata costeira para esta proba, en en vista do estable que parece o vento de SW, o Comité monta o seguinte percorrido: Saída, Tofiño (Eb), Vigo (Bb), Tofiño (Eb) e chegada. 10 millas e media en total.
Na seguinte imaxe pódese ver o percorrido real do Balea Dous, recollido por www.localizatodo.com

A saída convértese en clave para o resultado da regata, pois nos últimos cinco minutos o vento fai das súas. Unha caída radical do vento fai que os barcos que enfilan a liña de saída pola zona do barco o fagan con dificultade. Máis ao sur, pola boia os barcos saen navegando ben.

No Balea Dous saímos perto do barco e vémonos tapados por varios barcos. Á primeira oportunidade viramos a estribor e tratamos de buscar vento limpo. En seguida o vento refresca e rola a NW o que permite xa facer rumbo de baliza nada máis virar a babor. Comezamos a navegar rápido e con boa proa, levamos por diante ao Arroutado e ao Reira e por detrás ao Baltea. Pronto podemos apreciar que o grupo que vai polo sur leva outro vento e van quedando detrás dos que imos pola parte norte da ría. Deste xeito o Maracaná perdeu aí a súa oportunidade.

Viramos Tofiño sen moitas diferencias entre os do noso grupo e facemos rumbo de popa cara a Vigo. Ao final do tramo descolgámonos algo dos nosos competidores, pero nada máis virar e comezar a segunda ceñida, podemos facer mellor proa e volvémonos a colocar por diante de Reira e Baltea. O Arroutado vai por diante sen posibilidade de alcanzalo.

Na segunda popa mantémonos perto do Reira para evitar sorpresas e chegamos uns corenta segundo detrás del. Valeunos para voltar a ser segundos da clase e asegurar a mesma praza na xeral, polo momento.

A falta da última regata, non hai nada asegurado. Imos seis puntos por diante do Reira, pero matematicamente todo é posible. Haberá que saír a por todas. Como sempre.

CLASIFICACIÓNS:


Ata 28 clasificados.
Crónica en www.rcnauticovigo.com

Regata Open de Inverno 2009 – Sexta proba.

7 de marzo de 2009

A regata deste sábado foi un Barolvento-Sotavento de pouca lonxitude, 0,9 Mn entre boias, percorrendo un total de 5,5 Mn.
Vento frouxo de NW con algunhas roladas segundo as zonas.
A saída do Balea foi boa, controlando dende ese momento a posición dos rivais da clase, agás o Arroutado que se nos marchou, como xa e habitual.
Fixemos un segundo posto na clase e un sexto na global da etapa, exactamente igual que na anterior proba, quedando a pouco máis de un minuto do Cormorán 05, e por diante de barcos tan superiores como o Altamar, Caixanova ou Shoghun. Outra moi boa regata do Balea Dous.
Despois de esta etapa, e xa cunha proba descartada, afincámonos na segunda praza da clase, que haberá que defender nas dúas probas que faltan.

CLASIFICACIÓNS:

Ata 28 clasificados.

 

Regata Open de Inverno 2009 – Quinta proba.

28 de febreiro de 2009

Saída ás 16 h. para realizar o seguinte percorrido: Saída, Tofiño (Eb), Vigo (Bb), Rodeira (Bb), chegada en Vigo.
O percorrido real feito polo Balea Dous recollendo posicións cada 30 segundos co programa WayTRKR e enviado con teléfono mobil a www.localizatodo.com, o que permite visualizar en tempo real a ruta do barco, foi este:

Para ver o track en detalle, con tempos e velocidades: Aquí

A regata comeza cunha brisa de Oeste duns 6 a 8 nós. O Balea sae polo barco pero vese tapado por un grupo de barcos que buscan un oco, formando un bo tapón entre el e o barco. Ao quedar un pouco relegado, tan pronto vese libre das popas de barlovento, vira a estribor buscando ventos máis limpos e contando que a posible rolada irá á dereita. Neste rumbo cara ao Con do Pego vai á par do Palanquín, mentres os demais continúan no outro bordo.

Imos andando moi ben e superamos ao Palanquín en velocidade e barlovento, o que fai que decida virar para evitar ir á nosa popa. Prolongamos o bordo xa que a brisa refresca e buscamos a rolada do norte da ría. Neste rumbo, como se comproba no track da navegación, facemos máis de 5 nós.

A virada xa case nos da coa proa en Tofiño, e ao pouco unha pequena rolada permítenos facer rumbo á baliza sen apreturas. Imos moi ao norte do resto da flota pero coa sensación de ir navegando moi ben e de que a arriscada opción non vai saír mal.

Chegamos a Tofiño entre o grupo dos grandes, viramos por dentro do Menudeta (41 pes), e primeiros do noso grupo cunha vantaxe importante sobre a maioría. Na empopada cara Vigo mantemos a vantaxe e ao final do tramo Arroutado e Maracaná descólganse un pouco máis, co que comezamos a nova ceñida cara Rodeira con total control dos seguidores, e por unha vez, con posibilidade de facer primeiros, pois o Arroutado ven varios minutos por detrás.

Non podía ser tan fácil. A falta de trescentos metros para virar Rodeira, cae o vento case por completo, e tras virar, xa co spí arriba, parada total. Pero non para todos, porque nestas situacións é onde o Arroutado aproveita o seu “potencial”, e ao pouco xa o temos a sotavento. Nada que facer.

Recuperamos unha leve brisa que nos chega para entrar segundos, metendo ademais un barco ao Palanquín, o que nos vale para subir á segunda praza da clase. Posto que posiblemente perdamos cando se rexeite o peor resultado, pero é bo ir sumando, neste caso, o menos posible.

En conclusión, fenomenal regata do Balea Dous que foi durante toda a proba en primeiro lugar da súa clase, lugar que só perdeu pola caída total do vento e a pesar do que, fixo un sexto posto na clasificación global, quedando por diante de barcos de regata como o Shoghun, Cormoran 05, Unus ou Altamar, polo que hai que destacar o bo facer da tripulación e a excelente navegación deste barco.

Próximo sábado, unha dura proba para a tripulación: un barlovento-sotavento.
CLASIFICACIÓNS:


Crónica da regata en www.rcnauticovigo.com

Regata Open de Inverno 2009 – Cuarta proba.

14 de febreiro de 2009

Realizouse este sábado unha regata costeira de 10 millas con saída nas inmediacións do porto de Vigo e con pasos por Tofiño (Eb), Guixar (Eb), Vigo (Eb), Rodeira (Bb) e chegada en Vigo.

Excelente día de sol e boa brisa de WSW que non chegou a rebasar os 10 nós pero que se mantivo bastante constante toda a regata, con algúns roles e pequenas variacións de intensidade segundo zonas da ría.

O Balea sae pola boia coa intención de coller rumbo amurado a babor na primeira oportunidade, pois faise unha proa próxima á Torre de Tofiño que hai que virar, pero vese obrigado por varios barcos que veñen a estribor a seguir ata o peirao de trasatlánticos.

Na virada cara a fóra a proa é boa e navégase ben, pero apréciase que os que van máis ao norte, aínda facendo peor proa parecen ter mellor vento, polo que hai un grupo que vai polo centro da ría que colle unha lixeira vantaxe. Por aí navegan ben o Baltea e o Arroutado que se escapan do grupo.

Viramos Tofiño por detrás do Reira, do Palanquín e do Maracaná e comezamos unha empopada na que o vento vai a menos pola parte de Rodeira, optando os que o vemos dende atrás por trasluchar cara Bouzas. Neste tramo botámonos enriba de Maracaná e Reira. Forzamos ao primeiro a orzar gañando sotavento que nos da a vantaxe na trasluchada, na que o superamos.

En Guixar vira Reira e Balea detrás, comezando unha ceñida ata Vigo e logo un descuartelar ata Rodeira. O vento é o que lle gusta ao Balea e ao que lle saca o máximo partido, pasando ao Reira, ao que, como barco máis grande, o vento fáiselle pouco. O Maracaná nesta ceñida perde moito terreo, mentres o Palanquín mantense á par do Balea.

O tramo Rodeira-Vigo é un rumbo aos 60º de vento que se fai con spí un pouco forzado pero necesario. Chegada á par do Palanquín e facendo un cuarto posto, que permite subir unha praza na clasificación da clase.
CLASIFICACIÓNS:

Crónica de www.rcnauticodevigo.com

Regata Open de Inverno 2009 – Terceira proba.

7 de febreiro de 2009

Hoxe tocaba a agardada regata longa: Vigo-Morrazán (Ría de Pontevedra)- Vigo

Empezamos a regata bastante ben, afundímonos na Costa de Soavela e ao final, salvamos os mobles.

Primeira saída sobre as 13 horas que ten que ser anulada por fóra de linea masivo. A nosa saída foi moi boa, pero houbo que volver.

Tras a saída boa fomos sempre bastante ben colocados, cos do noso grupo. Á altura dos Castros agás o Baltea que ía diante, iamos todos xuntos. En varios pasamos por diante de Arroutado, Reira e Maracaná, en outros pasaban eles. Había moita diferencia ao facer o bordo a terra coa rolada que che favorecía pero o perdías ao ir ao mar. En Subrido non fixemos o bordo a terra e os demais se nos colaron, saíndo diante pola porta norte.

O vento empezou a caer e quedamos todos parados na Costa de Soavela. Os doldrums non fallan. Saímos do pozo de últimos así que tóca levar o faroliño. Incluso o Schtroumpf que fóra por Cíes colle vento antes que nós e pasa diante. Tal como se agardaba o día, podería volver a caer o vento pola tarde, polo que non perdemos a esperanza de coller ao grupo.

Entramos na ría de Vigo co solpor e unha brisiña de NW que co spí de través, levounos rápido a coller ao Schtroumpf, nada máis pasar Subrido. Podiamos ver que os de diante xa estaban parando entre a Borneira e Tofiño e apuramos o bordo o máis posible polo Norte da ría, levando case sempre o spí a 60º.

Pasando a Borneira, estabamos xa diante de Maracaná, Reira e Palanquín que se veían máis perto de Alcabre, e aquí tivemos que decidir se seguir polo norte co Schtroumpf, que en principio tampouco avanzaba moito, ou marcar aos do noso grupo. Recuperáramos o perdido pero se a eles lles entraba vento polo sur, volveríamos a quedar tirados. As previsións indicaban entrada de vento SW para esas horas e parecía o máis correcto. Erro. O Schtroumpf, polo norte da ría entrou detrás do Arroutado. O resto foi un suplicio con case nada de vento, rolando en cada bordo. Chegamos a Vigo rascando as pedras do Berbés e logo entablouse Norte. Aí pasaron o Palanquín e o Maracaná.

En total, un quinto posto que non resolve nada pero tampouco o empeora. Quedan moitas regatas para seguir metendo a pata.

CLASIFICACIÓNS:

 

Regata Open de Inverno 2009 – Segunda proba.

31 de xaneiro de 2009

Celebrouse na tarde do sábado 31 de xaneiro a segunda regata do Trofeo Open de Inverno do RCN de Vigo, nas horas previas á entrada dunha forte borrasca de Sur que se anunciaba con fortes ventos para o final da tarde. As predicións meteorolóxicas foron precisas, acertando a intensidade do vento e as horas en que foi progresivamente aumentando a súa forza. Se engadimos que a tarde mantívose seca e co sol asomando entre as nubes, temos que afirmar que tivemos unha excelente tarde de navegación.

A regata prevista para este día era un barlovento-sotavento que se montou entre Moaña e Vigo, dada a dirección case Sur do vento, co cal quedou un percorrido curto e moi dinámico, cun vento que en ningún momento baixou dos 15 nós, que case toda a flota realizou no tempo dunha hora, máis ou menos.

Impecable regata do Arroutado, que unha vez máis fíxose coa primeira praza absoluta, mentres o Balea Dous aguantou ben aos demais rivais da clase, agás no último tramo no que o Reira colleu unha vantaxe que lle valeu para entrar segundo, 14 segundos por diante do Balea.

CLASIFICACIÓNS:


Crónica de la regata en rcnauticodevigo.com